خرخاڵ

خرخاڵ

سوور‌پێستن،به دەوری گڕەوه
جەژنیانه
خرخاڵی دەستت
خرنگه خرنگ!؟
26/10/84 سەقز

قژ

گەر ئەتەوێ
شیعرت بۆ بكەم به پۆیلانه
هەموو شەوێ؛

مەهێڵه ئەم نووربارانه
! له دەم‌وچاوم بڕەوێ

ئاخر گیانه
كەوی شیعر
هەر به دێوجامەی قژی زەرد
!! تێ‌ئەكەوێ

1373/6/8 هەژان بابامیری•سەقز

****

بوخچەی غەریبیت
له جوگرافیای شیعرەكانما كردەوه

من وڵاتێكم دا به تۆ ؛
!تۆ ئاوارەییت پێ بەخشیم

**********

!دانیشه ، دا
!چەخماخه نووستووەكان وەخەبەر دێن

هەڵمەسته با پێش‌وەخت
دنیا ئاخر نەبێ ؛
! ! دانیشه ، دا

هەژان بابامیری• سەقز • 21/11/84

ئەرمەنستان

بادەوانەكان بۆ خۆ هەڵ ئەماسێنن؟
دەریا لەززەت ئەیژەنێ و
!كەشتی ختۆكەیێكە لە پیاوەتی
***********

ئەم هەموو پەری دەریاییە و
!گۆمی دڵێ ؟
***********

لەم دانسەدا
هەقلی مەقۆیانه
!ئەشق و ئەلیا
***********

پازێلێكە
له هەر چی جوانی ئەم دنیا ؛
تەنیا تۆی كەمه
!ئارمینیا
**********
چ دەربەسته
كەویر بێزووی پێ ئەكا
دەریا؟
كەویر بەو داخەوه وشكه
!دەریا هەمیشه دڵ تەڕه

***********
ژان به سوونامییەوه ئەگرێ
ئەم بێڕموودای گوناهه
وریا بن
!!هۆ ! رۆخ نشینان

هەژان بابامیری•ئەرمەنستان• 16/5/85

گەر چی چەند رۆژه نەمدیوی
شیعری جوانم بۆ نووسـیوی

كـــــــــردووتم به پەری تیایدا
قــــــــــژی گەردەلوولێ بایدا

ئەوەنده جـــوان و بێ گەردی
لە ئەم گەردوونەدا فــــــەردی

تكایه شــــــــۆخی بێ وێنە

وەرە بەردەم ئەم ئاوێنـــــــــه

با جوانترین كـــــــــــچ ببینی
!!بزانی چەندە شــــــــیرینی


هەژان بابامیری•سەقز• 2/7/85

سەفەر

پێش له گەیشتنی نامـــــــــــــەكەی
گەیشته لام ، بەرامــــــــــــــەكــەی

شــــــــــینه به دەشت و شاخـــەوه
شـــــــــــــــــــكۆفەیه به باخـــــەوه


ته یـره له گــــــــــــــــــەرمییانەوه
به رەوتێـــــــــــــــــكی نیــــــانەوه
مێــخەكـــه وا به ســـــــــــــێوەوه
شــــــــــیعرێكــی وا به لێــــــوەوه

ســـــــــەفەر تەواو بوو هاتــــه وه
به باوەشێ ســــــــــــەوقاتـــــه وه

نه ئەفســـــــــوونه نه جـــــادووه
خەڵكی هـــــــــەرێمی مێـــــــژووه
پیرۆزه وەك "میهـــــر" وەهــــا
بەســــــــــۆز و گەرم و پڕ بەهـــا
گڕێــــكـــی ئاتەشـــــــــــــــكەدەیه
مـــــــووبەدی مەڵبەنـــــــدی مەیه

ســـــــــــەفەر تەواو بوو هاتــەوه
خەفـــــــــــــــەت له بیر ئەباتـەوه

دەی وەرن كـــــــــــــــازەكاز كەن
قریوەیێكی ســــــــــــــــــــاز كەن
كچان بێن و به كاوەخــــــــــــــــۆ
خشڵ و خاوێ بدەن له خـــــــــــۆ
بڕۆن كــــــــــوڕان خەبەر بكــەن
مراد خــــــــــــــــانی له بەر بكەن
بێن و بیكەن به گــــــــــــــۆبەنێ
له خەم گەڕێن، گوێی مـــــــەدەنێ

ســــــــــەفەر تەواو بوو هاتــەوه
به پەیڤـــــــــــــــــی وەك نەباتەوه

له كوێن جەمـــــــاتی مەیــتەران ؟
دەســـەونەزەر له سەر ســــەران؟
وه خۆ كـــــــەون، درنگه وەخـت
ئەســــپ بێنن به زین و رەخــــت
دەســــــت وپێوەن كوانێ لەكوێن؟
تەشتی تەڵا له ســــــــــــــەر بنێـن
بێن و خـــۆیان تەیار كـــــــــــــەن
بارێ له زێـــڕی بار كـــــــــــــەن
خۆ ســـــاز كەن بۆ زێڕوەشـــــان
به بارتـــەقای یەك كاكەشــــــــــان
شـــــــــارێ به لاو و پیــــــریەوه
بێــــــــــــن و بچن به پیــــریـەوه

سـ‌ـــەفەر تەواو بوو هـــــــــاتەوه
دەركــــی دڵم ئەكـــــــــــــــــاتەوه

گـــــــــــەڕایەوه له دووری دوور
كەژاوەكــــەی له جنســـــی نوور
به باڵی چـــــــوار ســـــیمرخەوه
به راز و رێــــز و نرخـــــــــەوه
جلكـــــــی بەری ترووســــــكەیه
پانیـــــەی كەوشی برووســـكەیه
بسكـــــــی له تافی بەرز ئەكـــــا
پیــــاو به بینی لەرز ئەكــــــــــا
برۆی به دەوری چـــــــــــاوەوه
مـــاره به كانییـــــــــــــــــاوەوه
گــــــێلاسی گەیوه لێوەكـــــــەی
چ تورته چــــــــانه ســــێوەكەی
نەمـــــــامی تازه هەڵچــــــــووه
قـــــــــــــــەراری قەلبی مانووه
!به ناز دێ ! به ناز ئەچـــــــێ
له دەنگی نەرمی ســــاز ئەچـێ


ســـــــــەفەر تەواو بوو ، هاتــەوه
به خۆشیی و به هــــــــــــــــاتەوه
چــــــاو- له چاوەچاو كــــــــەوت
شـــــــــــار-له قاوەقاو كـــــــەوت
زام- له كــــــــاوەكاو كـــــــــەوت
ئاو - له ئاســـــــــــــیاو كـــــەوت


هەژ‌‌ان بابامیری٭سەقز٭20/12/84

پلەزیقان

شەماڵی هەرزه سڵ ناكا
نه له پەرژینی باران و
نه پەچەی تـەم؛

دەزنوێژی سـەوزی چی گەڵایه
!ئەیشكێنێ
هەژان بابامیری•سەقز
6/1/85

چاو

ئەو دوو كووزووی هەنگوینه
ئەو پەرژینە رەشانەیان بۆ چی بوو؟
خۆ كو ڕی ئەوێ بیانگاتێ
! بەو بەرزەوە
سەقز• 6/1/85هەژان بابامیری

پەرداخ

لێوت له ســـــــــــــــــــەر لێــوم دانا
دەمم لێو ڕێژ بوو له مــــــــــــــــــانا

تۆ ســـــــەبوو بووی ، منیش پەرداخ
لێوانلـــــــــێوت كـــــــــــردم لــه ئاخ

دارماڵت كردم لـە چــــــــــــــــــــامـ‌ـه
لـه واژەی جـــــــــــــوان و ڕەنـگامـه

خـــــــواردمـەوە هەرچی خــەمت بوو
زۆرت دامێ ، كـــــــــــــــەرەمت بوو

چەخماخەی ئاســــــــــــمانت تیا بوو
هەنیسكی بارانت تــــــــــــــــــیا بوو

دڵتەنگــــــــــــــــــــی ئێوارەت دامێ
لاوێتــــــــــــــــــــی دووبارەت دامێ

مووچڕكی ئەشقت پێ بەخشــــــــیـم
فڕینی تەشــــــقت پێ بەخشـــــــــیم

گوێزاتەوه چـی هەســــــــــــتت بوو
چی وشــــــــەی ژیر و مەستت بوو

بۆ دڵ و دەروونی كەیلــــــــــــــــــم
!شكا تاسەم ، نەبڕا مەیلـــــــــــــــم

هەژان بابامیری•سەقز•17/4/85

راز

له گۆمی شەوەزەنگ ئەدەم و
به ناو دڵی مەترسیدا
گوزەر ئەكەم

شەڵاڵی شەو
له بەردەم بارەگای كازیوەدا پێت ئەگەم

گەر له شەوسەرای چاوانتا
نەمشارییەوه
شار بەرده بارانم ئـەكا

داڵدەم بده
ئەی بەندەری هەنار و ئارامش
داڵدەم بده

ئێجگار نائارام و مانووم؛
با سەر بنێم به سینگتەوه و
تێر تێر بنووم

كه هەستمەوه ،بۆت باس ئـەكەم
له ستەمكاری تەقیانووس
لەو رەشه بایانـەی هێنای
له و پۆستاڵانەی بەریدانه سارای گوڵ

000000000000000

به داڵانی ترسا هاتووم
چی دارۆغەی ئەم چاخەیه بۆم ئەگەڕێن
دڵم پڕه لەو رازانه ی
له گەڵ دڵه كوتەدا جووتن؛
پەنام بده
با لە لای تۆ بیاندركێنم

لێو ڕێژم له چەخماخەی ئاماژه و
تەتەڵەی واژه و
له هەمان كاتیشا
كەروێشكە و بەرامە و هاژه
تەژی له راپۆرتی سەر بڕینی
چوار و چل و هەزارەها هەزار چــــــــــــــرا

000000000

من مرۆڤی سەردەمی ئەشق و
بارووت و كامپیۆتێرم
له یەك كاتا
شەڕم ، ئاگربەسم ، خێــــــــــــــرم

بارستایێك له هەنیسك و شـــیعرم

ئەو بەردەنووسه نەنووسراوەم
باس له كوشتاری حەرف ئەكەم

00000000000

تەنیا لە چاوی تۆدا
ئارام ئەگرم؛
چاوت میهرەبانترین شەوی گەردوونه
هیچ ئەهریمەنێ تیایدا زاوزێ ناكا

نەوەی سەدەكانی چل و پەنجا
بێ سەبرانه چاوەڕوانن
گەر ئەم راسپاردانەیان پێ نەگات
له چاوی تـۆوەی ئەزانن

000000000

شەڵاڵی شەو پێت گەیشتووم
له شەو سەرای چاوەكانتا
بمشارەوە

هەژان بابامیری—سەقز— 25/3/85